Oh wie mache mir d Auge weh,

wenn ych Basel schutte seh

Ych dängg immer, schlimmer goots nimmer

Doch dr FCB schafft das immer

​

D Zircher kemme ins stogge

Loot sy d SBB doch am Bahnhof hogge

Fir s näggscht Joor denn, s wär kai Saich

machets bitte glyych am Morgestraich

​

Als Rettigshund due ych gärn im Yysatz sto

Und hilf in Noot in Fäärn und Noo

Dr Apäll an Euch sag ych Euch hüt

Finger wäg vo de Rettigslüt!!!!!

​

Mi pubertierende Sohn dehai

seit zu allem prinzipiell Nai

Duet är drzue trötzelnd no syni Ärm verschrängge

so muess ych glatt an Joel Thüring dängge

d

Als Wältkulturerb s isch esoo

Läbbsch im 21 gföhrlig in Basel do

Uff jeede Dambuur hols dr Gugger

gits Begleitschutz vo siibe Schugger

 

Kai Clique, kai Waage, das isch gruusig

und nit emol e Guggemuusig

Drum bi ych z Rieche, und das isch nit gschimpft

Denn s Durchschnittsalter do, das isch scho gimpft

​

Me ka nit mol meh in e Baiz go dringge

Kai Adler, Schoofegg, das duet mir stingge

Da Umstand schloot mir nit uffs Gmiet

Jetzt dringg ych halt im BaselbietXY

​

Ych ha uff Telebasel gseh

dr Wessels singgt Bängg, ojeeminee

S macht weh, isch truurig und doch wohr

isch's no die bescht Sändig syt vyyle Joh

 

Bim WEF ha ych bi Gott

lääbenslänglig Huusverbot

Sy hän mi deerte ussegschmisse

Ych ha em Trump ins Fudi bisse

​

Zerscht het dä Biss mi schuurig gfreut

Doch am andre Daag ha ychs bereut

well ych wäg däm dumme Maa

sythär au no Tollwuet ha

​

​